Nagalaum si Dumaguete City Mayor Felipe Remollo, nga sini nga bulan sang Mayo tigayon na nga mapirmahan sang presidente ang NIR BILL agudto nga mangin laye.
Tatlo ka adlaw ang nagligad nag submit na si Remollo sang iya nga comment angut sa NIR Bill nga sa karon naga hulat sang lagda sang presidente. Naga panindugan sila suno kay Remollo nga dapat madayon na ang Negros Island Region nga naga isa sang Negros Occidental kag Oriental kag Siquijor sa isa ka rehiyon. Sa Mayo 20 ginapaabot si Presidente Ferdinand Marcos, Jr., sa Dumaguete City para sa pagpanagtag sang Certificate of Land Ownership Award ukon CLOA para sa Agrarian Reform Beneficiaries. Sa tunga sang pagpamatuk sang Diocese of Dumaguete sa NIR, suno kay Remollo, may mga consultation nga napatuman sadto pa. Nag operate na gani ang NIR sang tion ni Presidente Benigno Aquino, III, kag gin-repeal ni Presidente Rodrigo Duterte sang iya nga tion nga wala man gani sang may natabo nga consultation. Isa man ka political move yadto suno kay Remollo. Dugang pa niya, palareho man lang nga Pilipino ang mga pumuluyo sa isla, gani wala sang problema sa gina siling nga isyu sa kultura sa tunga sang Negros Occidental kag Oriental.
Handa na sila para sa NIR kag may lote na nga natigana sila para sa regional offices sa tion nga matigayon na ang pag operate sang NIR.