Alkalde sang banwa sang Moises Padilla kag duha ka mga department heads ang gin pamatbatan sang Ombudsman nga guilty sa kaso may kaangtanan sa pagsupak sa Ease of Doing Business Act ukon RA 11032.
Alkalde ang maga file naman sang motion for reconsideration.
September 11, 2023 sang nag file sang reklamo ang negosyante nga si Ramona Nalagon Villaflor, batuk kay Mayor Ella Garcia Yulo, Civil Registrar/Administrator-designate/Human Resource Managament Officer-designate Archie Montelibano kag Utility Worker II/Officer-in-charge, Busines Permit Licensing Office, Warren Jocson, bangud sang gina alegar wala rason nga delay kag sang ulihi pag deny sang iya nga application para sa iya nga business permit sa gina operate sini nga punerarya.
Sa desisyon sang Ombudsman, Enero 2023 nag-file sang application for business permit si Nalagon-Villaflor lakip na ang pag comply sini sa tanan nga requirement.
June 2023 gin-deny ang application ukon pag kaligad sang lima ka bulan.
Suno sa Ombudsman sa Section 9(b)(1) sang RA 11032 ang tanan nga application nga na submit ang dapat ma aktohan sang assigned officer sa prescribed time – indi maglawig sa three working days kun sa mga simple transaction kag seven working days sa complex transaction humalin sang pag kabaton sini ukon 20 diyas sandig sa pag pat-od sang natungdan nga government agency.
Isa man sa rason sang pag deny sang application amo nga ang utod sang complainant nag apply man sang business permit para sa amo nga negosyo sa amo man nga location.
Gin siling man sang mga respondent nga ang tagreklamo may kapaslawan sa pag comply sa mga documentary requirements nga nasaad sa ordinansa.
Pero ini nga bagay ang wala nila malakip sa ila nga sulat sa complainant sa ila nga pag deny sang iya nga business permit application.
Suno sa Ombudsman ang denial sang application ukon request para sa access sa government service ang dapat lubos nga gina paathag sa sulat kag ang basehan sini.
Ginpamatbatan sanday Garcia-Yulo, Montelibano kag Jocson guilty kag ginmaduan nga mag bayad sang fine nga equivalent sa anum nila ka bulan nga sweldo.
“We cannot please everybody, and there may indeed be complaints, but this will not weaken us in serving for the good of many”, suno kay Garcia-Yulo.
Sa karon suno kay Garcia-Yulo gina hikot na nila ang pag file nila sang motion for reconsideration.
Pasalig niya wala sang kabalak-an ang pumuluyo kay indi pa man final ang desisyon.