Nagapabor si Bacolod City Mayor Greg Gasataya nga magpatuman sang special audit ang Commission on Audit tuhoy sa completion rate kag pagka delay sang Legislative Building sang LGU.
Ini kasunod sa resolusyon nga ginduso ni Councilor Homer Bais sa Sangguniang Panlungsod nga mag-request sa COA sang special fraud audit sa amo nga proyekto, apang wala ini gin-aprubahan sang SP.
Suno kay Gasataya, mas maayo man nga madamo sang mga sektor kag indibidwal ang nagaduso sang pagpadasig sang pag-review sang tanan nga mga proyekto sang siudad sa idalum sang loan.
Dugang niya, tuigan man ini nga gina-audit sang COA, rason nga wala man kinahanglan itago ang siudad. Sa karun, gina-assess na sang City Engineer’s Office ang completion rate sang amo nga building.
Ginklaro man ni Gasataya nga wala pa maubos gamit ang 765 million pesos na pondo para sa Legislative Building. Nagapabilin nga 515 million pesos ang project cost suno sa iya bangud ang gindugang nga 250 million pesos para sa ikaduha nga phase sang construction ang wala pa ma bidding.
Sa 515 million pesos nga project cost, suno sa alkalde, masobra sa 300 million pesos palang ang tigayon nga nagamit para sa amo nga building.
As of September 30 sini nga tuig, yara palang sa 45.84 percent nga nahuman ang proyekto sandig sa joint committee report sang SP.
[sibwp_form id=1]