Isa ka netizen ang naka kuha sang video kun sa diin ginpapanaog sang isa ka lalaki ang sinako nga basura gikan sa iya nga salakyan kag ginbilin sa center island sa Hilado Street sa Bacolod City.
Isa pa gid ka lalaki ang dakop man sa video nga naga hal-id sang iya basura sa center island nga may naga tangkas na nga daan nga basura.
Sang kagab-i sa programa nga Isugid kay Mayor, ginmando ni Mayor Albee Benitez sa BENRO kag City Legal Office ang pagpasaka sang kaso sa amo nga mga persona.
Tigayon na nga nakilala ang tag-iya sang salakyan nga nakuhaan sang video sa bulig sang BTAO.
Suno sa mga street sweepers nga na assign maninlo sa center island sa Shopping area, halos kada adlaw sila naga sunod sa agi sa mga naga bilin sang basura diri. Halos ini na kuno ang kinaandan sang mga persona nga naga wigit lang sang ila basura.
Ang masubo lang kay samtang sila ang gina assign sang siudad para patahumon ang center island, may mga pumuluyo man nga wala naga untat sa pag wigit sang basura diri.
Gani suno sa alkalde, kinahanglan may ma sampolan para mauntat ang pamatasan nga kinaandan na.