14 ka mga pamilya nga may himata sa Middle East nagapangayo bulig sa Bacolod City hotline kag help desk bangud indi nila ma contact ang ila nga mga himata sa Middle East kasunod sang kinagamo karon didto
Nagbutang ang siudad sang amo nga talatapan kasunod sang pag atake sang Israel kag US sa Iran nga nagresulta man sa pagbalos sang Iran sa mga pungsod nga may military base sang Estado Unidos.
Ginsiling ni Mayor Greg Gasataya nga madamo sang Bacolodnon ang naga-obra sa Middle East, rason nga ginpatukod ang hotline kag help desk agud mabuligan ang mga OFW nga nagaka-apektohan sang konplikto.
Sa record sang help desk kaina sang aga, may mga pamilya ang personal nga nagpadulong sa ila talatapan samtang ang iban naman nga nagpangayo sang bulig pinaagi sa ila hotline.
Ang ila nga mga himata naga trabaho sa Qatar kag Saudi Arabia.
Sa 14 ka mga OFW, 12 diri na contact na sang siudad kag safe man sila.
Samtang, may isa naman ka taga Isabela ang nagpangayo sang bulig sa kapitolyo paagi man sa ginpatukod sini nga hotline.
Ginsiling ni Atty. Rayfrando Diaz II, ang provincial administrator sang Negros Occidental nga ang amo nga persona ang magapadulong kuntani sa Riyadh agud mag-obra, apang bangud sa nagakatabo nga ginamo, gin-cancel ang ila flight sa Hong Kong pa lang.
Dugang ni Diaz, ang probinsya na lang mismo ang magahatag sa iya sang inog-plete agud makapauli na ini sa probinsya. Sa mga may himata nga yara sa Middle East nga may kabudlayan sa pag-contact sa ila, makipag-angut lang sa mga hotlines sang siudad kag sang probinsya nga yara sa screen.*
[sibwp_form id=1]