Opisyal na nga ginlunsar sang Bacolod LGU kag Bacolod Gugma Foundation Inc., ang ika 47 nga MassKara Festival sini nga Biyernes.
Magasentro ang kahiwatan sa tema nga “share the smile; celebrate gugma.”
Sa launching, gin-anunsyo nga sa dalan sang SM City Bacolod, pagahiwaton ang Arena Dance Competition sini nga tuig. May mga bleachers man kag stage nga ipahamtang sa dalan para sa amo nga kompetisyon.
Ginsiling ni Bacolod City Mayor Greg Gasataya nga ginpakamaayo nila nga indi na pag-gamiton ang Paglaum Sports Complex bilang venue bangud daan na ini kag delikado na ang structural integrity kun magdamo pagid ang tawo.
Dugang pa niya, mas nami kun sa dalan sang SM ang arena bangud mas malapit ini sa public plaza kun sa diin pagahiwaton ang awarding ceremony.
Pito ka elementary schools ang magasambuwa sa street dance and arena competition sa Oktubre 17 samtang walo naman ka barangay sa barangay category sa Oktubre 18.
Ginkumpirmar man ni Festival Director Rodney Ascalon nga magabalik na sini nga tuig ang High School category kun sa diin apat ka mga eskwelahan ang magapasakop. Ini ang pagahiwaton man kadungan sa elementary level.
Samtang 15 naman ka mga kandidata sa Miss Bacolod MassKara ang opisyal nan ga ginsuksukan sang sash. Pagahiwaton ang coronation night sa Oktubre 11 sa STI West Negros University.
[sibwp_form id=1]