P5 ang average nga saka sa kada kilo sang retail nga bugas sa karon.
Ini suno kay Ronilo Yulo isa sa mga retailers sa Burgos Public Market sa Bacolod.
Ehemplo na lamang ang P48 nga kada kilo sang local rice subong sadto anay tag P43 lang ang kilo.
Ang Hasmin nga imported rice suno sa iya ang mahal man ang kilo – yara sa P60. Pero kun sinako sarang ini mahatag sa P2,650 tubtob P2,700. Enero nagsugod naman ang pagsulod sang imported nga bugas.
Nagsugod saka ang bili sa local rice suno sa iya sadtong ulihi nga semana sang Enero. Gikan sa Iloilo suno sa iya ang iya nga supply. P48 tubtob P58 pesos ang kada kilo sang local rice karon.
Suno kay Yulo, bisan ang miller naga siling nga diutay ang mga nagpagaling. Mahimo man ang production apektado bangud sang mga kalamidad nga naghalit sa pananom sang nag liligad nga binulan.
Sadtong Nobyembre lang nag igo ang Bagyo Tino nga nagdala sang daku nga kahalitan indi lamang gani sa mga pananum.
Ginsundan pa ini sang iban pa gid nga bagyo kag malain nga panahon nga nagdala man sang kahalitan.
Suno kay Pedro Limpangog ang presidente sang FIACN-BRIS ukon ang Federation of Irrigators Association in Central Negros-Bago River Irrigation System, natapos na ang north district sa ani kag namutikan gid man nga may pagnubo sa production. Pero gina sugdan na man ang ani sa southern district kag suno sa iya maayo ang ani.*
[sibwp_form id=1]