Matapos ang ginpatigayon nga online consultation meeting sang PNP angut sa Oplan Iwas Paputok campaign, may 66 tanan ka mga firecracker zones kag community fireworks display zones nga gin aprubahan sa 44 ka mga barangay sa Bacolod city.
Ang pila sa ini nga mga barangay ang may isa tubtub apat ka mga designated zones.
Ang iban nga mga barangay ang wala nakahatag sang ila designated zones.
Suno sa Executive Assistant to the Mayor nga si Ernesto Pineda nga pamuno man sang Sectoral Concerns sang siudad, sa ini lamang nga mga lugar sarang makapalupok ukon makagamit sang pyrotechniques.
Ang madakpan nga nagasupak sini ang mahimo multahan ukon mabilanggo.
“Masakit-sakit na ang penalty sina 20 to 30 thousand with imprisonment nga 6 months to one year or both depende sa pag ano sang court,” suno kay Pineda.
May yara man sang panugyan ang Regional Operations Division sang PNP sa mga local government units nga likawan anay sini nga tuig ang pagpatigayon sang mga community fireworks display ukon New Year’s countdown para malikawan ang pagdagsa sang mga pumuluyo sa mga pampubliko nga lugar.
“Ang mga fireworks display ukon ang ining countdown gina discourage gid kay ini nagatuga sang mass gathering ukon convergence sang mga tawo wherein nga naga kwan kita sang health protocol naga violate,” suno kay Pineda.
May yara sang suspension sang curfew sa Bacolod humalin las onse sang gab-i sa bwas nga adlaw tubtub las tres sang aga sa Enero uno.
Pero nagapahanumdum si pineda sa publiko nga kun mahimo sa tagsa ka panimalay na lamang magtingub ang kada pamilya para sug-alawon ang bag-ong tuig.