Indi na dapat pwede maka biyahe sa dalanon ang mga traditional jeepney kay wala na maghatag pa sang extended provisionary authority ang Land Transportation Franchising and Regulatory Board para sa mga operators sang traditional jeepney sa Bacolod.
Pero sa meeting sang katapo sang transport sector upod sanday LTFRB Regional Director Richard Osmeña, gin ayo ni Bacolod City Mayor Albee Benitez nga matagaan sang special permit ang masobra 3,800 ka mga driver/operators para makapadayon sila sa pagbyahe.
Labi ini nga ginapasalamatan ni Diego Malacad, secretaty general sang United Negros Drivers and Operators Center bisan pa kutob na lang March 2023 ang pagbyahe sang mga traditional jeepney sa siudad.
Ginapaabot naman ini sang mga drayber kasubong ni Jojo Pocasas. Pero karon pa lang nagalibog na ang iya ulo kun ano ang palaabuton sa tion nga mawad an siya sang palangabuhian.
Nakigsapol man kaina ang pamuno sang LTFRB kag ang alkalde sa mga driver/operators sang kapin sa isa ka libo naman nga franchise awardee para sang modern jeepney. Sila ang ginalauman maga serbe sa mga pasahero kun indi na magbyahe ang mga driver/operator sang traditional jeepney sa madasun nga tuig.