Arestado ang isa ka pasahero nga manug sakay sang roro vessel sa BREDCO Port kahapon matapos nga ma intercept nga may dala ini sang iligal nga droga nga naga balor sa P1,020,000.
Ang gindakop amo si Marcial Delos Santos, 49 anyos nga residente sang La Paz, Iloilo.
Suno kay Agent Dalisay sang PDEA, masakay kun tani sa roro vessel padulong Dumangas si Delos Santos sang nagpamalibad ini nga ipaagi sa scanner ang iya nga bag amo nga gin usisa ini sang Philippine Coast Guard kag sang PDEA.
Didto positibo nga na detect sang sniffing dog ang kontrabando kag sang ginbuksan sang PDEA ang bag nakita ang tatlo ka putos sang gina patihan shabu sa sulod sang medyas. Padayon karon ang pag usisa sang PDEA sa suspek.
Nag alegar ang suspek nga ginpadala lang sa iya sang indi niya kilala nga persona ang medyas kag wala siya makahibalo nga shabu ang unod sini.
Detained siya sa Police Station 2 kag kaso nga pag lapas sa RA 9165 ang ipasaka batuk sa iya.