Masobra na sa 20 ka mga salakyan nadakpan sa tatlo na ka adlaw sang anti-colorum operations sa Bacolod.
Nag tirin-tirin ang mga traditional public utility jeepney kag modern jeepney sa dalan sa may Barangay Alijis sa Bacolod.
Mga taga Bacolod Traffic Authority Office na ang naga dala sini padulong sa Bacolod City Police Office kaina sang aga.
Kalabanan sa ila mga kulang sa mga papeles kag may mga violation gani gindakop sa anti-colorum operation sa siudad sang Bacolod.
Suno kay Land Transportation Franchising and Regulatory Board Regional Director Richard Osmeña, posible nga maglawig sang isa ka semana ang dakpanay ilabi na sa mga jeep nga expired na ang provisional authority kag iban nga kulang nga mga papeles.
Kaupod man sa anti-colorum operation ang Land Transportation Office kag Bacolod Traffic Authority Office.
Sa una nga adlaw sang operation sang Lunes, siyam ka mga PUJ ang nasampolan, nagdangat sa kinse sang kahapon kag subong masobra na sa beinte.
Suno pa kay Osmena nga kapin sa 70 percent na karon ang mga modern jeeps nga nagabiyahe sa siudad kag ginalantaw nila nga indi malab-utan Disyembre, 100 percent na sang approved units ang nagabyahe sa dalanon sang Bacolod.