Dako nga kabudlayan para sa katapo sang Manokan Vendors Brotherhood Association ang tig-P25,000 nga kada bulan nga balayran nga utang pati na ang dugang nga bulanan nga renta para sa ginadumala nga stall sa Manokan Country.
Sa 14 ka mga stall owners nga may kapin P6.8M nga delinquent accounts, duha diri ang natalana pasirad-an bangud wala nakabayad sandig sa nakasugtan nga compromise agreement.
Gani nagpadala na sila sang sulat kay Mayor Albee Benitez agud ihinyo nga maligwat ang napirmahan nila nga compromise agreement.
Suno kay David Montoya, pamuno sang asosasyon sang Manokan Vendors, sa baylo nga P25,000 nagalaum sila nga mapanubo kuntani sa tig-P10,000 ang ila bulanan nga balayran sa utang.
Natalana sila nga makigsapol kay Councilor Celia Flor may angut diri bwas sa hapon.
Luyag man nila makasugilanon ang alkalde may angut sa Public Private Partnership project nga ginaduso sang SM Group.
Ginkahangaw-an sang stall owners nga kun matigayon ini sarang sila mawad-an sang palangabuhian.