Nagpanawagan ang management sang Negros Occidental Electric Cooperative sa mga konsumidor nga may madako ukon unusual nga pagsaka sa ila bulanan nga electricity bill, nga kung mahimo magkadto sa pinakamalapit nga NOCECO office agud nga mahatagan ini sang nagakaigo nga assessment kag aksyon.
Sa billing sini nga bulan sang Mayo, may isa ka konsumidor sang NOCECO sa Hinigaran kag duha sa Kabankalan ang nag-post sa social media angut sa tagalumapaw nila nga bill tubtob halos P1 Million.
Nakibot ang isa ka konsumidor sa Barangay Tagda sa Hinigaran sang makabaton sang bill nga nagdangat sa P922,223.75 bangud suno sa iya residential ang ila rate kag yara lang sa P4,000 to P6,000 ang ila average nga konsumo sa kuryente kada bulan.
Suno naman sa NOCECO, paagi sa ila verification nahibaluan nga naga-operate sang water refilling station kag laundry shop ang nasambit nga konsumidor. Nakabaton sila sang reklamo sadtong Mayo 18 nga nasunog ang metro bangud sang guba nga terminals kag naislan naman ini pagkasunod nga adlaw.
Ugaling ang final reading sa daan nga metro ang na-encode sa ila system, nga nagresulta sang sala nga billing amount sa Statement of Account.
Dugang pa sang NOCECO nga nakay-o na ang meter reading kag na-inform na ang consumer sang iya updated kag corrected nga bill.
“Siyempre ikaw mismo as consumer you know nga kabahol kaayo ang imo nga bill and indi na siya usual para sa imo, indi average nga consumption ang gin-billing sa imo. So instead, makadto na lang sila sa nearest nga NOCECO office kag didto sila ma-report, on the day gid mismo if possible nga makakadto sila. Centralized ang aton billing mong. Kung diin ka na-belong nga area, didto ka namon nga office makadto. Sa sub-office ka makadto, indi sa connection. But we have five sub-offices. And posting it (on social media) is not advisable gid siya kay indi ka da nakon masabat. Rather than going to the office, where definitely i-assist ka gid kay on our part man para at least ma-resolve man, wala na problema kag mahatagan aksyon”, suno kay Sia.*
[sibwp_form id=1]