Patay ang mister samtang pilason ang iya misis matapos makabunggo ang ila ginasakyan nga motorsiklo sa nagapundo nga Isuzu dump truck sa Panaogao, Barangay IV sa Silay City, kagab-i.
Nakaangkon sang malubha nga injury sa ulo ang driver sang motor nga si alyas “Sani,” 25-anyos, kag ang iya asawa nga si alyas “Marie”, 29-anyos, pareho residente sang Hacienda Purisima sa Brgy. E Lopez sa Silay.
Base sa police report, gindala ang mag-asawa sa Teresita Lopez Jalandoni Provincial Hospital apang gindeklarar nga dead on arrival ang bana, samtang ang iya asawa ang ginsaylo sa Riverside Hospital sa Bacolod City.
Nag-gwa sa imbestigasyon sang Silay PNP nga papauli na kuntani sa Brgy. E Lopez ang mag-asawa sakay sa ila nga motorsiklo, sang sila ang nakabunggo sa pang-ulihi nga bahin sang dump truck.
Naga-ulan sang tion nga natabo ang insidente.
Ginahibalo pa sang kapulisan kun sino ang tag-iya sang truck, nga gin-alegar guba kag madugay na nga nakapundo sa lugar.
Suno sa pulis, may mga traffic cones nga nakabutang sa palibot sang truck.*