Dumot ginapatihan motibo sa pagpaniro sa mag-amay kag sa ila kaupod nga caretaker sang kampo sa banwa sang Moises Padilla. Suspek gin alegar naka away sang amay nga biktima.
Luwas na sa katalagman ang amay nga si Norman Saldo kag ang iya onse anyos nga bata nga lalaki matapos sila ang mag angkon sang pilas sa hawak, alatrasan kag tiil sa nagluntad nga pagpaniro sa Barangay Inolingan Martes sang gab-i.
Nagapabilin man nga nagapabulong sa ospital ang upod nila nga caretaker sang kampo nga si Joel Escaner nga may pilas man sa tiil tuga sang igo sang bala sang wala pa mahibaluan nga kalibre sang pusil.
Sa pagpangusisa sang Moises Padilla PNP nagakatulog ang mga biktima sa payag sang ginsulong sang gunman.
Suspek sa pagpangluthang ang wala anay ginhingadlan nga lalaki nga naka away ni Saldo antes pa man natabo ang pagpaniro.
Nagapati si Police Major Randy Babor, hepe sang Moises Padilla PNP nga dumot ang rason sa nagluntad nga krimen.