Duha ka mga kabuhi ang nautas sa nagluntad nga head-on collision sang duha ka mga motorsiklo sa national highway nga sakop sang Crossing Biaren, Barangay Manalad sa banwa sang Ilog, Negros Occidental, mga las 8:43 sang gab-i, Miyerkules, Hunyo 17.
Dead on arrival sa ospital si alyas “Vincent”, 26-anyos, isa ka Sangguniang Kabataan chairman sang Barangay Yaoyao sa banwa sang Cauayan nga naga-obra man bilang maestro sa isa kolehiyo sa Kabankalan City.
Samtang, sini nga Huwebes sang kaagahon, nakabaton sang impormasyon ang Ilog PNP nga nagtaliwan sa ospital ang rider nga ginkilala kay alyas “Jonel”, 29-anyos, taga Ilog.
Nagwa sa imbestigasyon nga nag-overtake sa isa ka salakyan ang Skygo nga motor nga ginamaneho ni alyas “Jonel” rason nga nagsaylo ini sa pihak nga lane, kag nakabunggo sa nagapadulong nga Yamaha Sniper sang maestro.
Padulong sur sa direksyon sang Cauayan ang maestro, samtang pa-norte naman ang isa ka motor.
“In fact ari gid di subong ang both sides’ representatives. Ang ginikanan sang naga-drive sa Skygo is ato sa gwa kag ang iya tatay ato man sa Iloilo. Diri sa pihak sa SK chairman, ato lang to ang iya ginikanan sa ila balay. Ang iya utod kag tiya ang ari diri subong. Maga-istorya sila upod ang aton traffic investigator,” pahayag ni Lt. Billones.*
[sibwp_form id=1]