Love Negros ang handa magsuporta kay Board Member Manuel Frederick Ko sa plano sini nga mag tiglawas sang Abang Lingkod Partylist sa 2025.
Ini suno kay Negros Occidental Governor Eugenio Jose Lacson nga isa sa mga lider sang Love Negros nga gina tapuan ni Ko. Gintuad ni Ko sa katapo sang media sang Martes nga naistoryahan na nila nanday Bacolod Mayor Albee Benitez, 3rd District Congressman Francisco Benitez kag Abang Lingkod Partylist Representative, Stephen Paduano ang plano sa 2025 kun sa diin siya ang mangin first nominee sang amo nga partylist.
“Definitely on the Love Negros side we are ready to support Board Member Manman Ko to represent Abang Lingkod” , suno kay Lacson.
Samtang, ginsiling naman ni Lacson nga humalin pa man sadto, ang mga Alvarez na ang ila nga gina suportahan sa 6th District. Ini bilang reaksyon sa ginpagwa nga pahayag ni anay Hinoba-an Mayor Ernesto Estrao nga may plano siya nga mag papili bilang Congressman sang 6th District.
Suno kay Estrao ginahulat lamang niya ang ila nga oathtaking sa PDP – Laban para ma finalize ang plano. Yara karon sa iya nga second term bilang 6th District Representative si Mercedes Alvarez.
“Definitely, we’ve always been supporting the Alvarez for 6th District. So I don’t see any changes as far as that is concerned. Personally, I have not been given that information that former mayor Estrao has announced that he is running”, suno kay Lacson.