Sa banwa sang Moises Padilla may 362 ka mga pamilya nga nadulaan sang balay bangud sang Bagyo Tino ang indi na makabalik sa ila mga lugar bangud sakop sila sang no-build zone.Libre nga evacuation naman ang ginatanyag sang banwa sa ila.
Sang Miyerkules nagsapol mismo si Mayor Ella Garcia – Yulo sa mga apektado nga pamilya upod ang mga barangay officials.
Ginpaathag sa ila nga gindeklarar sang national government nga no build zone ang ila nga mga lugar bangud sang peligro nga dala sang amo nga location.
May isa ka ektariya nga relocation site sa Barangay Inolingan nga iga donate sang tiyo sang alkalde nga si Eric Golez. Yara na sa mga natungdan kun gusto nila magsaylo diri.
Suno kay Garcia-Yulo ang P10 million nga ginhatag gikan sa Presidential Assistance Fund ang gamiton sa pag bakal sang materyales sa mga maga patukod sang balay.
Maga pangayo man siya sang assistance gikan sa Provincial Government kag sa talatapan ni Congressman Dino Yulo. Ginapaabot man ang commitment sang mga pumuluyo bahin sa labor para mabululigan ang pag patukod sang mga balay.
Magluwas sa 362 may 556 pa gid ka pamilya nga ang mga balay nagkalaguba pero sarang pa makabalik sa ila lugar kag masugdan ang pag patukod. May 3,856 naman nga ang ila balay partially damaged ukon mga 50 por siento sang ila puluy-an naguba.
Sa karon gina hulat ang report sang mga punong barangay angut sa kun pila gid sa ila nga mga pumuluyo ang luyag mag relocate sa site sa Inolingan.
“Ang relocation site gin-donate na siya ni Mr Eric Golez, wala na ya money involved da. Ang P10 million ya amo na siya ang ibakal namon materials para sa mga balay sang tawo. Indi na pag i-divide ang kwarta, kundi para ibakal materials”, suno kay Garcia-Yulo.*