Huwebes nga adlaw, nagsapol si Bacolod City Mayor Greg Gasataya kag ang mga tiglawas sang Tourism Infrastructure and Enterprise Zone Authority ukon TIEZA parte sa redevelopment sang Public Plaza.
Isa sa mga ginkadismaya sang alkalde amo ang pagkakalbo sang mga duta sa palibot sang plaza, bangud wala na ini sang mga hilamon kag tanum.
Ginklaro ni Engr. Gregory Oller, Assistant Chief Operating Officer sang TIEZA nga sandig sa contingency plan sang proyekto, obligado ang Amigo Entertainment Technologies Incorporated, nga amo ang contractor sang proyekto nga ibalik ang landscaping nga ila natandog samtang nagakaayo sila.
Dugang pa niya, ang tanan nga mga ginkutkutan nga mga duta, kag mga hilamon kag tanum nga naguba, ang dapat sila mismo ma restore.
Ila naman ginmanduan ang contractor nga ibalik sa daan mga hitsura ang mga hilamon, apang sang nagligad pa nga semana gintanuman sang siudad ang mga nakalbo nga area.
Gin-ako man sang TIEZA ang kakulangan nila sa kooperasyon bangud suno sa ila, kulang pa ang ila mga engineers sa karun.
Iga-assess sang TIEZA ang mga nahuman na sang Amigo sa plaza agud mahibaluan kun nagsunod ini sa proposed nga design, lakip na ang kontrobersyal nga fountain area sa tunga sang checkered floor.
Ginahaylo naman sang alkalde sang siudad ang TIEZA nga ipaggwa ang tanan nga dokumento kun sa diin gingasto ang 328 million pesos nga redevelopment sang plaza kag BCGC fountain.
[sibwp_form id=1]