Lalaki nga gin-alegar may deperensya sa paminsaron, gintutdan ang truck nga may karga nga tubo. Siya ang natiruhan sang tanod sa banwa sang Isabela.
Patay ang isa ka lalaki nga gin-alegar may deperensya sa paminsaron matapos matirohan sang tanod sa Barangay Sikatuna, banwa sang Isabela, Lunes sang gab-i.
Nag-gwa sa imbestigasyon nga ginabantayan sang barangay tanod nga si alyas “Teodor”, 62-anyos, ang truck nga ginapanag-iyahan sang kapitan. Apang gulpi lang nga gintutdan ni alyas “Savy” ang karga nga tubo sang truck.
Rason nga nanaog si “Teodor” sa truck kag ginkompronta si “Savy”, nga naga-uyat sang bato kag sundang.
Didto na nagpukotay ang duha, tubtob nga nagkuha ang tanod sang pusil kag gintiro ang biktima sang makapila ka beses.
Nagbulig ang suspek pati na ang iban nga mga residente sa pagdala sa biktima sa ospital, apang siya ang gindeklarar nga dead on arrival.
Gindala sa police station ang tanod apang siya ang nakagwa man matapos mag-lapse ang reglementary period para sa iya detention, nga wala sang kaso nga napasaka batuk sa iya.
Ginsiling ni Police Major Joseph Partidas, hepe sang Isabela PNP, may pila na ka beses nga ginareklamo sang pumuluyo ang biktima, nga masami nagapang-bato ukon nagasinabad sa lugar, ugaling wala lang nila ginapadalman tungod sang iya sitwasyon.
Nahibaluan nga ang pusil nga gingamit sang tanod ang ginapanag-iyahan sang kapitan kag kumpleto ini sa papeles.
“Ang firearms iya sang barangay kapitan so amo pa na ang ginalantaw namon if may negligence bala sa part kung paano nakuha ang armas or nabilin sa truck kay ang truck iya sang kapitan.. nabilin sa truck kag ginkuha sang tanod or ano”, suno kay Partidas.*
[sibwp_form id=1]