Patay ang 25 anyos nga lalaki matapos gintiro sa parking area sang motorsiklo sa gwa sang isa ka ilimnan 18th Street, Barangay 7, siudad sang Bacolod, Domingo sang kaagahon.
Ang napatay ginkilala kay Juan Marco Garino sang Brgy. Caliban, banwa sang Murcia.
Suno kay Police Capt. Glenn Montaño, hepe sang Police Station 2, masakay na kuntani sa motorsiklo ang suspek upod ang iya nobya sang gina-alegar ginlagas sila ni Garino.
Antes sini may natabo nga komosyon sa sulod sang ilimnan suno sa pulis gani naglikaw na ang suspek.
Matapos nga ginsumbag sang biktima, ginkuha sang suspek ang iya armas sa utility box ukon u-box sang iya motorsiklo kag gintiro si Garino.
Ginhingagaw pa dala si Garino sa ospital apang gindeklarar nga dead on arrival.
May igo siya sang bala sa likod. Nakilala na sang PNP ang suspek apang wala anay gin palayag ang iya nga ngalan samtang naga padayon pa ang ila nga pagpangita sa iya.