Martes sang ginserbe mismo ni DILG Bacolod Officer Joy Madayag ang tatlo ka bulan nga suspension order ni Punong Barangay Noli Villarosa sa barangay hall sang Tangub.
Pero ang amo nga suspension order para sa kaso nga simple misconduct ang wala ginbaton ni Villarosa.
Ginsiling ni Villarosa sa Digicast Negros nga indi siya manaog sa puesto, tubtob nga mismo ang mataas nga pamunuan sang DILG ang magaserbe sini sa iya.
Suno kay Madayag wala man ginbaton ni Villarosa, ginakabig sa gihapon sang DILG nga napatuman ang amo nga suspension order.
Bwas nga adlaw, Miyerkules, suno kay Madayag iga-serbe nila ang memorandum sa pag assume sang number 1 nga kagawad nga si Luz Atienza bilang tig tal-os ni Villarosa.
Suno kay Madayag nabaton nila ang order subong nga adlaw rason nga subong man nga adlaw nila ginserbe ang suspension order.
Na file ang reklamo sa Office of the Ombudsman.
Tatlo ka bulan nga suspension without pay ang ginpamatbat kay Villarosa para sa simple misconduct base sa desisyon nga ginlagdaan ni graft investigation and prosecution officer II nga si Rogie dela Cuesta Fernandez nga napetsahan August 12, 2020 sa Cebu City.
Ang desisyon may kaangtanan sa reklamo sang barangay kagawad nga si Dindo Amadeo sadtong 2019 kun sa diin ginsumbag sya ni villarosa sa isa kapehan malapit sa barangay hall. Gintunaan sini ang indi pagpahibalo sa kay Villarosa sa ginpatigayon nga buy-bust operation sa barangay.
Sa press conference nga ginpatigayon sang Marso angut sa kaso, ginhimutig ni Villarosa ang pagpanumbag.
Suno kay Villarosa ginahingabot siya sang siudad.
Pila lang ka oras humalin sang siya ang liwat nagpungko sang Marso bangud sang 6 months preventive suspension, ginsiling ni Villarosa nga nabaton niya ang kopya sang amo nga suspension order.