Digicast Negros

Kampanya sang Bacolod EOC para sa pagpabakuna ginsuguran sa social media

Nagsugod na kagabi ang daily vaccine update nga kabahin sang public information and education campaign sang Bacolod Emergency Operations Center para mahaylo ang publiko nga magpabakuna.

Sa sulod sang 30 ka minutos, ginapamangkot ni Bacolod EOC deputy for medical Dr. Chris Sorongon ang ila bisita nga doktor sang mga masami nga palamangkutanon sang mga pumuluyo tuhoy sa bakuna.

Nangin resource person ang infectious disease specialist nga si Dr. Rommela Tiples-Ruiz nga nagpaathag sang ginatawag nga side effects nga mabatyagan sang isa ka persona matapos nga mabakunahan.

“Buot silingon nga pag inject sa imo pwede nga makabatyag ka sakit pagkatapos, paghubag, kun kis-a mapula, masakit magiho sang imo nga butkon, pwede ka hilanaton, magsakit ang imo ulo, pwede ka mag chills, palanakit kalawasan, kasu-kasuhan, ginatawag ni siya nga reactogenic effects, buot silingon nga pag inject sa imo, ang imo lawas naga react, nagatuga ang imo nga lawas sang pangontra na, nagasugod na nga magreact so ina sya nga mga epekto ang ginahambal naton nga damo nga side effects transient lang na, temporary lang asta mga tatlo ka adlaw kag pwede lang na ya nga mainom ka paracetamol,” suno kay Tiples-Ruiz.

May pamangkot man kun kinahanglan pa bala sa gihapon nga magsunod sang minimum health protocols ang isa ka persona nga nadapatan na sang COVID-19 vaccine.

“Ang bakuna isa lang na siya ya sa mga interventions naton so ang minimum health standard protocols sigehon na siya naton gihapon, isa sa napamatud-an na na kay ti ang bakuna so far sa nastudyuhan na nila sa maga batos nga hindi gid man siling nga tanan sila hundred percent gid ang efficacy, so there may be a chance nga ma infektar kita sa amo na gihapon nga kinahanglan ta gyapon mag mask, mag face shield, mag handwashing kag mag distancing,” suno kay Tiples-Ruiz.

Ginpahayag man ni Dr. Tiples-Ruiz kun ano ang ginatawag nga emergency use authorization nga isa lamang ka temporaryo nga pahanugot nga ginahatag sang food and drugs authority para magamit na ang isa ka brand sang bakuna sa pungsod.

Suno sa iya, kada brand sang bakuna ang may nagkalain-lain nga efficacy pero napamatud-an naman ini tanan nga makahatag sang immunity sa virus.

“There’s a lot of deaths associated with covid and taking the vaccine even with just 50 percent efficacy is already something to hold on to buot silingon additional na na siya naton nga protection, ang aton panumdumon no vaccine is perfect and no vaccine is hundred percent effective pareho na sang aton mga bakuna nga ginahatag sa kabataan, sa adults, like sa amon ya gahatag kami sang influenza vaccine, influenze vaccine is not 100 percent effective, it’s like around 58 to 60 percent effective the least but we see that ang aton mga elderly they are being protected by the vaccine,” suno kay Tiples-Ruiz.

Ang daily vaccine update ang gina updan man sang Philippine College of Physicians–Negros Occidental chapter kag Philippine Society of Microbiologists and Infectious Diseases–Western Visayas chapter.

Sarang ini malantaw kada adlaw, las sais sang gab-i sa official social media account sang Bacolod City Public Information Office.

Exit mobile version
Skip to toolbar