Gin pa gwa sang mga gwardya ang mga nagakinaon pa nga mga costumer sa Ribshack sa dalan Lacson Miyerkules sang gab-i, matapos nga napuog sang madamol nga aso ang kalan-an.
Sa mga litrato kag videos nga nagalapta online, makita nga bitbit pa sang pila ka mga costumer ang ila mga ginakan-an nga pinggan pagwa sa kalan-an. Ang iban naman padayon lang sang kaon sa gwa, samtang naga responde ang mga bumbero.
Sandig sa report sang Bureau of Fire Protection, nagtawag ang mga empleyado sa bumbero bangud tuman na ka damol sang aso nga nagagwa sa chimney sang kalan-an kag sang mabuksan ang kisame sa kitchen area sang Ribshack, may kalayo man nga nakita ang bumbero.
Nagdangat sa first alarm ang sunog kag minutos lang ang nagligad, tigayon naman nga napalong ang kalayo. Wala man naglambot sa dining area sang kalan-an ang sunog.
Padayon pa nga gina-usisa sag BFP ang ginhalinan sang sunog kag wala man sang na report nga may nasamaran. Kapin sa 5,000 pesos ang halit nga ginbilin sang sunog suno sa BFP.
Sa statement nga ginpagwa sang Ribshack, temporaryo anay sila nga sirado apang magabukas liwat ini kun safe na nga magamit sa liwat ang ila nga pasilidad.
[sibwp_form id=1]