Kakulang sang road signs madasun nga tagaan atensyon sang DPWH sa Bacolod Negros Occidental Economic Highway.
Madamo na sang mga motorista ang naga-gamit sang BANOCEH agud nga makalikaw sa pag-gutok sang lakat sang trapiko.
Ini bisan pa ginakulang pa sang mga road signs ang highway nga naga-angut halin sa Barangay Sum-ag pakadto sa Bacolod – Silay Airport access road sa Talisay City.
Ginpahayag ni DPWH Western Visayas Regional Director Engr. Sanny Boy Oropel nga ini ang madasun nila nga tagaan atensyon ilabi na nga ginapaabot nga gamiton ang highway para sa mga trucks kag heavy equipment.
Si Councilor Al Victor Espino nga nagapamuno sang Committee on Traffic and Transportation ang nagduso nga matun-an sang katapo sang Bacolod Traffic and Transportation Management Department ang pagpatuman sang total truck ban sa Circumferential Road kag ang pagtalana sang BANOCEH nga mangin alagyan sang mga trucks kag heavy equipment nga naga-alagi sa nasakpan sang Bacolod.