Matapos nga ginreklamo sang isa ka business owner ang Environmental Specialist sang Bacolod City Environmental and Natural Resources Office bangud sang gina-alegar fixing, ginpaidalum na siya sa 60-day preventive suspension without pay sumugod Martes.
Ini ang ginkumpirmar ni Bacolod City Legal Officer Joseph Karol Chiu, Miyerkules sang hapon.
Suno kay Chiu, nagbaton sang 10,000 pesos pinaagi sa GCash si Llanes gikan sa isa ka business owner kabaylo sang pagpadasig sang pag proseso sang Environmental Certificate Compliance kag iban pa nga mga dokumento nga kinahanglan sang owner para sa iya resort.
Ginreklamo ini bangud, matapos nga nagbayad na ang resort owner, wala man naproseso ang mga requirements. Natabo ang insidente sang Setyembre sang tinalikdan nga tuig.
Dugang pa ni Chiu, gin-ako man mismo ni Llanes paagi sa iya written response nga nagbaton siya sang amo nga kantidad.
Bangud sini, ginpapanaogan na sang kaso administratibo si Llanes kag sa karun wala na ini ginapareport sa opisina tubtob matapos ang preventive suspension.
Ginakwestyon man sang CLO ang gulpi nga pagsaka sang position ni Llanes gikan sa Salary Grade 1 padulong sa Salary Grade 15.
Gintinguhaan sang Digicast Negros nga makuhaan sang pahayag si Llanes apang wala pa siya nakasabat as of press time.
[sibwp_form id=1]