Nagdangat sa masobra 4,000 ang gin-report napatay nga baboy sa probinsya sa May 19 nga report sang Provincial Veterinary Office.
Suno kay OIC – Provincial Veterinarian Dr Placeda Lemana, nalakip sa datus ang mga nagkalamatay sa hog cholera, heat stroke, pneumonia kag iban pa nga masakit.
Dugang pa niya ang 4,308 nga mortality as of May 19 nga report nagalakip sang yadtong mga gin-ihaw kag emergency nga ginbaligya, bangud ginkabig man ang mga ini nga apektado sang masakit.
Ang banwa sang San Enrique ang may pinaka mataas nga gin-report nga mortality – 1,800, Bago – 838, Valladolid – 576, Pulupandan – 315, La Carlota -247 kag Pontevedera 230.
Wala man gina dula sang probinsya suno kay Lemana ang posibilidad nga may African Swine Fever sa Negros Occidental pero ang resulta man lamang sang laboratory test ang maka pat-od sini.
Padayon ang disease surveillance. Gina paabot sa sini nga semana ang resulta sang lab tests.
Negatibo sa ASF ang Bacolod City suno kay Lemana base sa resulta sang random sampling nga ginpatigayon sang nagligad nga semana.
Samtang, isa sa mga kabudlayan nga gina atubang karon amo ang pag-dispose sang pila ka mga mangunguma sang patay nila nga baboy. May yara sang mga naga haboy lamang sin isa suba, nga kabangdanan man sang pag lapta pa gid sang masakit suno kay Lemana.
“Nakita naton sa datus nga ang San Enrique, Valladolid, Pulupandan, kay tungod ara da ang lowland. May mga tubigon. Amo na siya nga dasig ang pag spread sang virus”, suno kay Lemana.