Sunset beach market sa Sipalay nakadala sang masobra P1M nga income sa mga magagmay nga mga negosyante.
Sa ika anum nga tuig sang paghiwat sang Sunset Beach Market sang Sipalay City Tourism Office sa Población beach sang siudad, nangin dako ini nga bulig para sa mga magagmay nga negosyante.
Base sa consolidated report, naglab-ot sa masobra sa P1.1M ang income sang 20 ka mga micro, small kag medium enterprises sa sulod sang lima ka adlaw nga pagbaligya. Ini bisan pa may mga inadlaw nga nagbunok ang ulan. Mas mataas ini sang masobra kun ikumparar sa malapit sa P800,000 nga income sang mga negosyante last year sa sulod naman sang tatlo ka adlaw.
Dako ang pagpasalamat sang mga magagmay nga negosyante sa local government unit kag sa tourism office nga naka pensar nga magpatigayon sang aktibidad ilabi na subong.
Pinaagi sa Sunset Beach Market naka income sila sa pihak sang ka puraot.
Sa Sunset Beach Market sang Sipalay, mga local products kag pagkaon ang sarang mabakal samtang gina enjoy ang matahum nga sunset kag beach sang siudad.
Nagalaum sila nga padayon ini nga suportahan sang mga pumuluyo kag sang mga turista para padayon man nila nga matanyag sa mga turista ang mga bagay nga ginapabugal sang Sipalay.
[sibwp_form id=1]