Indi na kinahanglan nga magtabok pa sa Iloilo ang mga estudyante nga gusto mag-eskwela sa Philippine Science High School bangud sa Barangay Granada sa Bacolod City, ipatukod ang pinakadako nga campus sang Pisay sini nga tuig.
Nakigsapol na ang pamunuan sang Philippine Science High School kay Bacolod City Mayor Greg Gasataya kahapon nga adlaw kag nakasugtan na nga Nobyembre sini nga tuig, pagasugudan na ang construction sang eskwelahan.
Malapit sa 10 ka ektarya nga duta sa Barangay Granada ang gin-donate sang siudad para patukuran ang ika 17 nga campus sang Pisay.
Ang Bacolod- Campus ang mas dako kag mas malapad pa sang sa main campus sang Pisay sa Quezon City.
Department of Science and Technology ukon DOST naman ang magapondo para sa pagpatukod sang mga building.
Ginsiling ni Atty. Marty Go, Secretary to the Mayor, mangin operational na ang eskwelahan sa masunod nga school year kag sarang ini maka accommodate sang 120 ka mga qualified nga grade 7 enrollees sa una nga tuig.
Ang Pisay ang isa sa mga prestihiyoso ang mabudlay sudlon nga public school sa Pilipinas. Naga focus sa advanced subjects sa science, technology, engineering, kag mathematics ukon STEM ang eskwelahan.
Magabaton man sang full government scholarships kag iban pa nga mga benepisyo ang tagsa ka estudyante nga makasulod diri.
Ginklaro man ni Go nga apesar sa Bacolod ipahamtang ang eskwelahan, bukas ini para sa tanan nga taga Negros Island.
Antes matapos ang 2026, magapatigayon sang school-to-school campaign ang DOST kag Pisay sa mga eskwelahan sa Negros Island Region agud mahaylo ang mga Grade 6 students nga magkuha sang Philippine Science High School National Competitive Examination sa January 30, 2027.
[sibwp_form id=1]