Mga nagapuyo sa nabukid nga parte sang Himamaylan City ginkadtuan sang nagkalain-lain nga ahensya sang gobyerno para madala ang pila ka mga serbisyo lakip na ang COMELEC registration.
Bisan ang bato-batohon nga alagyan, mga banglid, suba kag ang malawig nga biyahe wala makapugong sa nagkalain-lain nga mga ahensya sang gobyerno nga malab-ot ang Sitio Madaja, Barangay Buenavista sa Himamaylan City.
Sa post sang COMELEC Negros Island Region, tigayon sila nga naka rehistro sang 50 ka mga pumuluyo sa area. Las 6:30 sang aga sila nagbiya sa Himamaylan City proper kag tigayon nga nalab-ot ang area Las 10:30 sang aga.
Wala sang kuryente ang area pero pinaagi sa generator set sang barangay natigayon ang voter’s registration.
Suno kay Atty. Keinth Horario, ang COMELEC officer sang Himamaylan, mabudlay na sa mga pumuluyo didto ang manaog sa ila lugar kay limitado ang transportasyon gani sila na mismo ang nagsaka didto.
Kaupod man sang COMELEC ang CSWDO nga nagpatigayon sang feeding sa lugar kag pagpanagtag sang hampanganan kag food packs.
May medical and dental consultation, circumcision kag panagtag sang bulong ang City Primary Care facility.
Ang army may libre tuli kag gunting kag ang DepEd nanagtag man sang school supplies.
Ang COMELEC ang nagpasalig nga kadtuan pa gid ang iban nga mga nabukid nga area sang siudad para mapalapit ang serbisyo sang gobyerno.
“I tried my best nga dal-on ang COMELEC sa malayo nga lugar, sa nabukid nga lugar kay ako naga pati be nga ang tawo didto mabudlayan pa magpanaog sa proper so why not kami mismo ang mapalapit sa tawo” suno kay Horario.
[sibwp_form id=1]