Lima tanan ka mga eskwelahan sa Sagay City ang nagbaton sang mga water tanks para masuptan sang tubig ulan nga magamit ilabi na nga ginapaabot ang mabaskog nga El Niño.
Ang mga eskwelahan amo ang Buenaventura M. Mahilum Integrated School, Matabas Elementary School, Molocaboc II Elementary School, Molocaboc Integrated School kag Suyac Elementary School.
Kalabanan sa sini nga mga eskwelahan nahamtang sa isla gani isa sa mga problema nga ginapangatubang amo ang ninit ukon wala gid sang supply sang tubig.
Gani pinaagi sa ginhugpong nga pwersa sang Philippine Red Cross, RU Foundry and Machine Shop Corp., RU Eco-Agri Foundation, State University of Northern Negros, DepEd, talatapan ni Cong. Alfredo Maranon III kag Sagay City Government, natagaan sang mga water tanks ang ini nga mga eskwelahan.
Nasuguran na sadto sang Red Cross kaupod ang anay president sang CPSU nga si Aladino Moraca sa sini nga proyekto sa Kabankalan City kag karon ila na ini nga gindala sa Sagay.
Tinutuyo sang proyekto nga makabutang sang rain water catchment system para sa hygiene kag sanitation education para sa mga estudyante kag makabulig sa food security pinaagi sa pag gamit man sang tubig sa paghimo sang kaugalingon nga organic farming sites sa mga benepisyaryo nga eskwelahan.
[sibwp_form id=1]