Good Vibes: Bag-ong kasal nagkabayo na lang kay kamahal sang krudo kag gasolina

Madamo sang nalingaw sa video sang newly wed couple nga taga Barangay Santol sa banwa sang Binalbagan, Negros Occidental, nga nagsakay sa kabayo pakadto sa ila reception.

Mga tunga sa oras nga sila ang nagkabayo tubtob nga nakalab-ot sa ila reception sa Sitio Amilis, kun diin nagahulat ang ila mga himata kag abyan nga ang iban gikan sa Negros Oriental kag sa tabok isla – sa Iloilo.

Suno sa bride nga si Pearl Dency Balinas Faburada, ang iya ginsakyan nga kabayo, ang madugay na nila nga hinuptanan kag ginapanag-iyahan pa sang iya lolo.

Napinsaran nanday Pearl kag sang iya bana nga si Rommel Sevilla Faburada nga magkabayo agud mangin lain naman sa masami nga salakyan nga ginagamit bilang bridal car.

Dugang pa nga sa subong nga panahon, masyado kamahal sang gasolina kag krudo kun salakyan ang pagagamiton.

Pagpanguma ang obra sang 23-anyos nga bride kag 24-anyos nga groom. Nagsugod ang ila love story sang sila ang magkit-anay sa kamotehan nanday Rommel.

Wala maghuna-huna si Pearl kag Rommel nga mangin viral ang ila video kag sila ang nalipay bangud nakahatag man ini sang entertainment sa iban nga tawo, ilabi na sa sini nga tion nga may krisis sa gatong.

[sibwp_form id=1]