Nag panguna ang Bacolod City, Sagay City, kag Sipalay City sa mga siudad sa Pilipinas sa patag sang turismo matapos nga nahakot sang tatlo ka siudad sa Negros Occidental ang nagkalain-lain nga mga pasidunggog sa ginpatigayon nga Association of Tourism Officers ukon ATOP Pearl Awards sa Ormoc City, Miyerkules sang gab-i.
Ginpasidunggan ang Bacolod Chicken Inasal Festival sang Bacolod bilang Best Local Event Hosting samtang nangin Best International Event Hosting naman ang Terra Madre Asia and Pacific nga ginhiwat sa siudad sang tinalikdan nga tuig. Nakuha man sang Bacolod ang Best Tourism Promotions Brochure.
First runner-up man ang MassKara Festival sang Bacolod sa Best Tourism Event Cultural Festival kag amo man ang MassKaralympics 2025 sa Best Sports Tourism Event.
Ginsiling ni Councilor Jason Villarosa, pamuno sang Committe on Tourism nga ini ang pinakauna nga tion nga lima ang nakuha nga award sang siudad matapos nga napaslawan ini nga makakuha sang tinalikdan nga tuig.
Suno sa iya, gina highlight sang siudad ang turismo, ilabi na ang food kag sports tourism bangud ini ang isa sa mga makaganyat sa mga turista nga magbisita sa Bacolod City.
Magluwas sa Bacolod, nakuha man sang Sipalay City ang kampyeonato sa Best Tourism Month Celebration, Best Practices on Sustainable Tourism, kag Best Tourism Oriented LGU sa component city category.
Samtang tatlo man ang nakuha nga kadalag-an sang Sagay City, lakip na ang Best Practices in Community-based Tourism, Best Tourism Souvenir- Non food category, kag Best Tourism Promotion Brochure.
[sibwp_form id=1]