Nangin dako nga problema sang mga residente kag negosyante sang isla sang Siquijor ang adlaw-adlaw nga mga brownout sang nagligad nga tuig. Bangud sini ginbawi sang Energy Regulatory Commission ukon ERC ang Provisional Authority to Operate ukon PAO nga gin issue sa Siquijor Island Power Corporation ukon SIPCOR ang power provider sa isla nga gina panag-iyahan sang pamilya Villar.
Pero nagpagwa sang desisyon ang Court of Appeals Special 7th Division nga naga baliskad sang amo nga desisyon sang ERC.
Sa desisyon sang korte nga gin papanaog sang July 24, 2026, ang petition for review nga gin-file sang SIPCOR ang gin-grant sang CA bangud napaslawan ang ERC maghatag sang due process sa pagbawi sang PAOs sang generation units sang SIPCOR.
Isa sa mga nakita sang korte amo ang sitwasyon sang power supply sa Siquijor naga kinahanglan sang madasig nga desisyon halin sa ERC pero suno sa CA wala man ini naga kahulogan nga indi na mahatag ang nagakaigo nga proseso para sa SIPCOR.
Ginkwestyon sang SIPCOR ang desisyon sang ERC nga pagbawi sang tanan nga PAO bangud wala masunod ang nagakadapat nga proseso.
June 2025 ginmando sang ERC ang pagbawi sang PAO sang electric company bangud sa reklamo sang mga pumuluy sa 5 tubtob 10 ka oras nga mga brownout sa isla kada adlaw nga nagpadayon sa pila ka tuig.
Maga-file naman sang motion for reconsideration ang ERC kag handa sila nga dal-on ang kaso sa Korte Suprema kun kinahanglan.
[sibwp_form id=1]