Ginsiling ni Atty. Lyzander Dilag,spokesperson ni Mayor Albee Benitez nga handa ang administration nga tindugan ang mga financial obligation ukon mga utang nga dapat bayaran sang siudad.
Gani ila nga ginapangita ang original copy sang multi lateral agreement sa tunga sang Bacolod city government upod sa AstraZeneca Pharmaceuticals Philippines, Incorporated, National Task Force Against Covid 19 kag Department of Health. Ini may angut sa nabilin nga masobra 434 thousand ka doses sang bakuna nga gin advance purchase sang Leonardia administration sang 2021.
334,000 doses ang nag expire na sang Marso sa DOH Central Office kag kapin sa 100,000 ang maga expire naman sa madasun nga sinemana.
Ang City Legal Office ang maga review kag maga validate sang kontrata antes pa man desisyonan sang Benitez administration ang pagbayad sang 98 milyones pesos nga ginasukot sang AstraZeneca para sa mga bakuna.
Si Benitez ang damlag pa nagsiling na nga indi siya magbayad para sa mga nag expire na nga bakuna nga wala man ma deliver sa siudad kag nag expire lang sa central office sang department of health.
May 650,000 doses ang ginbakal sang siudad sa AstraZeneca, 216,000 ang nadeliver kag napangbakuna na.