Naglab-ot na sa 1,448 ang kaso sang dengue sa Bacolod halin sang Enero asta Setyembre sa record sang Bacolod City Health Office, 246 percent ini nga mas mataas kun ikumpara sa nagligad nga tuig.
Ginsiling ni Environmental Sanitation Division head Dr. Grace Tan, sarang pa magsaka ang kaso sang dengue ilabi na nga tig-ululan.
Gani kutob sa mga eskwelahan sa mga barangay nga may clustering of cases sang dengue may ginapatuman nga scheduled fogging operation.
Kabahin sa mga barangay nga may clustering of cases ang Barangay Taculing nga may 171 ka kaso, Barangay Bata 136; Mansilingan 107; Estefania 106; Villamonte 100; Alijis kag Granada nga may 70 ka dengue cases; Sum-ag 68 cases kag Barangay Mandalagan nga may 67.
Hugot nga nagapanugyan ang pamunuan sang CHO sa publiko nga ipatuman ang 4 o’clock habit nga pag panglimpyo sang palibot, pagpatuman sang search and destroy sang mga lugar nga sarang hukmungan sang lamok.