Sa pinaka una nga tion ginpatigayon ang coordination meeting sang mga regional directors sa idalom sang Negros Island Region kaina.
Upod sa mga regional directors sang NIR si Negros Occidental Governor Eugenio Jose Lacson, kun sa diin gintalakay sa pag panguna ni National Economic Development Authority Concurrent Regional Director, Arecio Casing Jr., ang roadmap para sa NIR.
Gintalakay ang phases sang transition, partial establishment kag full operation sang NIR pag-abot sang January 2027.
Ginsiling man sang NEDA nga pagkatapos na sang eleksyon sa Mayo ang pagtukod sang Regional Development Council.
Ang mga ginapaabot mangin katapo sang RDC ang gina pa submit man sang programs, actitivities kag projects ukon ang PAPs para sa project prioritization sa NIR.
Sa pihak nga bahin, gin present man sang probinsya paagi kay Provincial Administrator Rayfrando Diaz ang posible sites sang regional offices sa Negros Occidental.
Una ang sa Matab-ang sa Talisay City kun sa diin may 250,120 square meters nga propiedad ang probinsya.
Suno kay Diaz, may site development plan na, pero wala pa nasuguran kay wala pa man sang decision kun bala ini ang gamiton sang NIR offices.
Ipaagi ini sa usufruct agreement.
Ang probinsya ang maga pa develop sang dalan, pag pabutang sang kuryente kasubong man supply sang tubig.
Kun gina siling nga sa 2027 pa mangin fully operational ang NIR bangud nga ang sa budget sa 2026 maga tutok anay sa pag establish sang mga talatapan kag personnel, naga santo lamang ini sa amo nga proposal.
Ika duha nga site ang sa 7,500 square meters nga propiedad sang probinsya sa cottage road sa Bacolod kun sa diin paagi sa build-operate-transfer contract sa idalom sang Public Private Partnership magapatukod sang 28 storey building.
Ini nagabili sang 6 billion pesos kag nalakip na Annual Investment Plan.
Multi-use ang amo nga building.
Ang gina tanyag sang gobernador sa mga proposals nga ini mangin “one-stop-shop”.