Duha ka mga Agriculturist 1 sang Office of the Provincial Agriculturist ang gin papanaugan sang show cause order angut sa na missing nga masobra sa 700 ka bag sang abono sa warehouse sa Tabunan sa Bago City.
Gina pasabat sanday Joy Cardinal kag Herminigildo Basilio, mga in-charge sang bodega sa Rice Processing Center sa pagkadula sang 789 ka bag sang abono nga naga balor sang 2,367,000 pesos.
Sa show cause order nga ginlagdaan ni Provincial Administrator Rayfrando Diaz sa authority ni Governor Eugenio Jose Lacson, October 18, 2023, sang maga withdraw kuntani sang abono nga na allot sa ila ang banwa sang Cauayan pero wala natigayon bangud wala na sang may nabilin pa.
Gina pasabat sila sa sulod sang lima ka adlaw humalin sang pagkabaton nila sang show cause order.
May 2 nabaton ni Cardinal ang show cause order kag Abril 28 naman kay Basilio.
Suno kay Provincial Legal Officer, Alberto Nellas, Jr., wala na malakip sa show cause order ang security personnel bangud ang ila nga katungdanan ang pagbantay man lang sang perimeter sang amo nga lugar.
Gintinguhaan naman sang Digicast Negros nga makuhaan sang ila nga bahin ang duha pero as of press time wala sila makasabat sa messages nga ginpadala.