Nagdangat na sa masobra 116.7 million pesos ang balor sang humanitarian assistance nga na release sang Department of Social Welfare and Development Western para sa mga na apektuhan sang paglupok sang bulkan Kanlaon. Samtang, PHIVOLCS ang padayon nga naga pahanumdom sa publiko nga padayon mag aligmat sa sitwasyon sang bulkan Kanlaon.
Sa report sang DSWD Western Visayas as of May 22, masobra sa 77.2 million pesos ang balor sang food packs nga na-release, masobra naman sa 9.7 million pesos ang mga non-food items nga napanghatag kag masobra sa 29.7 million pesos naman ang na release nga financial assistance kaangay sang AICS/ECT. May masobra naman sa 13.6 million pesos nga assistance ang na-release gikan sa LGU kag 14.7 million pesos naman gikan sa NGO kag iban nga organisasyon. May 1,684 ka pamilya ang nagapabilin sa 13 ka mga evacuation center sa Negros Occidental. Sa pihak nga bahin, nag-record sang 18 volcanic quakes ang Kanlaon sa May 23 nga report sang PHIVOLCS.
978 naman ka tonelada sang sulfur dioxide flux ang na-record. Ang plume naman yara sa 100 meters ang kataason. Padayon ang ground deformation ukon paghabok sang bulkan. May pag nubo sa mga na-record nga activities sang bulkan suno kay Mari-Andylene Quintia ang resident volcanologist nga nabase sa Kanlaon Observatory sa La Carlota City nga mahimo nga may naga porma nga plug ukon pag bara sa systems sang bulkan gani indi dapat nga mag kumpiyansa.
“Pwede na nga makabig naton nga manaba ang iya sulfur dioxide ga form na naman ang iya nga plug sa iya nga system. Indi kita mag complacent. Lalo may volcanic earthquakes pa kita na record”, suno kay Quintia.