Dry run para sa magabyahe nga electric jeep sa Barangay Vista Alegre magasugod bwas bisan pa may nagapamalabag nga TODA. Pagasuguran ang lima ka adlaw nga dry run para sa magabyahe nga electric jeepney sa Barangay Vista Alegre kag Barangay Cabug sugod bwas.
Kabahin ini sa gin-aprobahan sang Land Transportation Franchising and Regulatory Board para sa ginadihon nga green routes sa Bacolod.
Walo tanan ka mga e-jeep ang gamiton para sa separado nga dry run. Ini sa pihak man sang pagpamalabag sang pila ka mga katapo sang tricycle operators and drivers association sa Barangay Vista Alegre nga nagakabalaka sa epekto sang dugang nga rota sa ila matag-adlaw nga palangabuhian.
Ginpahayag ni Mayor Albee Benitez nga ang mga e-jeep ang ginalauman mangin alternatibo nga option para sa mga katapo sang transport sector nga nagpaidalom sa jeepney modernization program.
Nagpanugyan si City Administrator Lucille Gelvolea nga kuntani mapadangat sang katapo sang TODA ang ila concerns sa barangay agud ini ang gilayon nga matagaan atensyon samtang nagapadayon ang ginahimo nga pagtuon sa ginaplano nga green routes.