“Don’t drink ang drive”, ini ang hugot nga paandam sang pamunuan sang Bacolod Disaster Risk Reduction Management Office karon nga amat-amat nga nagadamo ang ila ginarespondehan nga insidente sa dalanon kun diin kadam-an sa mga biktima mga naka-inom.
Humalin sang nagligad nga semana nangin masako na ang katapo sang Bacolod DRRM emergency medical services sa pag-responde sa mga nagaluntad nga aksidente sa dalanon.
Suno kay City DRRM head Dr. Anna Marie Laarni Pornan, kalabanan sa mga pasyente nga gintatap sang mga emergency and rescue team mga naka-inom kag halin sa mga party. Masami nagabuya pa sang malain nga hambalanon sa mga naga-bulig nga responders. Paandam ni Pornan sa mga motorista karon nga bulan sang paskwa nga ipaiway gid ang pag-maneho sang salakyan ukon motorsiklo kun naka-inom. Napanugyan man siya sa mga emergency responders nga ipabilin ang maximum tolerance agud malikawan ang tension sa tion nga may emerhensya. Nagapangabay man siya sa katapo sang barangay health emergency response teams nga mangin alerto agud wala sang pasyente nga mabihangan sa ila pagserbisyo.