Sa kuha sang closed circuit television ukon CCTV sang isa ka gasolinahan sa Barangay Alijis, Bacolod City makita ang pagpalagyo sang isa ka brown nga pick up truck matapos nga nagpatughong ini kag wala nag bayad.
Ang insidente natabo sadtong Hulyo 17, kun sa diin gina-alegar nga nagpasalig ang drayber nga mabayad gamit ang credit card.
Apang, samtang ginakuha sang gasoline boy ang terminal para sa card, gilayon man nga nagpalagyo ang salakyan.
7,800 pesos ang ginpatughong sang drayber nga wala nabayaran.
Nagdangat na sa igtalupangud sang Land Transportation Office Negros Island Region ang ini nga insidente kag ila na ginapasungka ang suspetsado.
Wala pa matumod sang otoridad kun sin-o ang drayber bangud wala sang plaka ang ginamaneho sini nga pick up truck.
Ginpaandaman na sang LTO-NIR ang nasambit nga drayber nga kun makilal-an na siya, handa ang ahensya nga i-revoke ang iya nga driver's license kag i-impound ang salakyan nga yara sa video.
Handa man magpasaka sang criminal charges ang LTO sa natungdan.
Natapos na ang 24 oras nga ginhatag sang LTO-NIR sa drayber apang wala pa sang impormasyon kun naka sungka gid man ini ukon wala.
[sibwp_form id=1]