Site icon Digicast Negros

Diaz: Daan na nga isyu ang gin file nga reklamo kag isa ka political harassment

YouTube player

Duha ka mga persona nga gina tiglawas sang ila nga abogado ang nagsulat sang reklamo sa Deputy Ombudsman sa Visayas angut sa paghire sang probinsya sang mga job order workers nga taga Bacolod City.

Sa kopya sang complaint kun sa diin ginhatagan man sang kopya ang katapo sang media, gina reklamo nanday Jonathan Buyco nga taga Talisay City kag Lilibeth Carballo nga taga Escalante City si Provincial Administrator Rayfrando Diaz, OIC-Provincial Budget Officer Gemma Flores, Provincial Accountant Annabelle Magalona, OIC-Provincial Human Resource Officer Felomina Gozon, Provincial Treasurer Atty Amy Grace Boliver, Merly Frio kag Jade Miraflores sang Provincial Human Resource Department, angut sa pag hire bilang job order workers sang 23 ka mga taga Bacolod.

Ila gina-alegar nga kuntani ang amo nga hiring naparteneser sa mga pumuluyo sang probinsya.

Dugang pa nila sila ang nag apply man kuntani sa lokal nga panguluhan sang Negros Occidental, pero wala sila nabaton kay wala sila sang mabakod nga endorsement gikan sa isa ka pulitiko.

Wala labot diri ila gina alegar nga ang 23 nga mga JO, mga election operators ni Bacolod Mayoral Candidate Albee Benitez nga provincial consultant man sang Negros Occidental.

Bangud sini, ila ginareklamo si Diaz kag ang anum ka iban pa sang technical malversation of public funds kag pagsupak sang anti-graft ang corrupt practices act.

May kopya nga nabaton si Diaz sang amo nga reklamo.

Suno sa provincial administrator, daan na ang issue kag nasabat na ini damlag pa.

Ini ang isa ka political harassment suno kay Diaz kag lantawon na lamang suno sa iya ang abogado – Vaflor and Alimon, nga naga tiglawas sang duha ka tagreklamo – amo man ang nga naga uyat sang disqualification case batuk kay Benitez.

Wala man sang laye nga naga dumili sang pag hire sang probinsya sa mga residente sang Bacolod.
Paathag ni Diaz, ang mga gina hire qualiified kag makabig nga asset.

Ang 23 nga gina tumod suno kay Diaz may mga trabaho kag ini sila mga contact tracers.

Kabahin man ini sa tuyo sang gobyerno probinsyal nga mabuligan ang ekonomiya sa paghatag sang trabaho.

Wala naka sabat si Atty Marcus Vaflor sa Digicast Negros. Indi mapat-od kun na file na gid man ang reklamo sa Ombudsman.

Exit mobile version
Skip to toolbar