Committee on Markets magakonsulta sa mga ambulant vendors angut sa pag-renta sang private lot sa kilid sang Bacolod Economic Highway sa Barangay Cabug.
Nagsugot na ang tag-iya sang duta sa kilid sang Bacolod Economic Highway nga i-lease ang iya propiedad para magamit sang mga ambulant vendors. Sa pagsinapol sang Committee on Markets sang konseho sang Bacolod nagsugot sadto ang tiglawas sang mga ambulant vendors sa plano sang siudad agud bisan paano makapadayon sila sa pag-negosyo sa kilid sang highway. Ini samtang wala pa ma-turn-over sang DPWH ang proyekto sa siudad.
Ginsiling ni Councilor Celia Flor nga liwat sila nga magakonsulta sa mga vendors agud matigayon ang negosasyon sa tunga sang Bacolod LGU kag tag-iya sang duta. Nangin atraksyon na sa mga bumalakal ang mga baligyaan sa kilid sang highway. Pero indi malipod nga apektado ang lakat sang trapiko bangud may pila ka mga baligyaan nga nagalapaw na sa karsada rason nga nagahatag kabudlayan sa mga motorista.