Pamuno sang kapulisan sa Bacolod nagapati nga indi na kinahanglan ang muzzle taping sa ila mga pusil karon nga holiday season.
Nagahulat pa si Bacolod City Police Office Director Col. Noel Aliño sang mando gikan sa PNP Headquarters angut sa pagpatuman sang muzzle taping ukon ang pagpamutang sang tape sa mga service firearms sang mga kapulisan.
Sadto anay kada bulan sang Disyembre, ang muzzle taping ang ginapatuman agud mapaiway ang indiscriminate firing ukon wala sapayan nga pagpalupok sang armas sang kapulisan kun nagahilapit ang adlaw sang paskwa kag pagsug-alaw sang bag ong tuig.
Pero, para kay Aliño indi na ini kuntani kinahanglanan bangud sarang ini maka apekto sa ginapatuman nga responsibilidad sang mga pulis ilabi na kun may magluntad nga krimen.
Nagapati siya nga disiplina ang kinahanglan sa tanan nga katapo sang kapulisan bangud kun may yara man sang magsupak sang pagsulundan nga pulis bagay lang nga dapat kasuhan.