Tagdumlahan sang Corazon Locsin Montelibano Memorial Regional Hospital ang nagpagwa na sang statement angut sa natabo nga paglumpat sang isa ka Covid-19 positive gikan sa 5th floor sang ila nga building.
Base sa statement sang ospital nga gin pirmahan ni Dr. Julius Drilon, ang medical center chief II sang ospital, iya ginsiling nga wala sang may nakita nga indi amo sa pang gawi sang pasyente antes ini naglumpat sang kahapon.
Enero 21 gin admit sa ospital ang 68 anyos nga pasyente bangud sang mga komplikasyon tuga sang Covid-19. Sa 5th floor sang West Tower building siya na admit.
Ang mga staff sang ospital nga naga tatap sa iya wala man sang may nadeparahan nga indi amo sa iya nga pang gawi.
Diyes minutos antes siya naglumpat natagaan pa siya sang bulong sang nurse.
Mga las dose sang udto may nabatian na lang ang security personnel nga lagabong sa atop sang water treatment facility. Didto na nakita ang lawas sang pasyente.
Wala mahibaluan kag wala may naka kita kun paano siya naka lumpat.
Sa karon naga pabilin sa morge sang ospital ang Covid patient. Naga pakig angut na ang ospital sa iya nga pamilya.
Dugang pa sa statement, naga pangabay ang ospital sa publiko sang panagamuyo para sa mga pasyente kag health care workers nga malampuwasan indi lang ang pisikal nga kakapoy kundi pati ang mental stress nga dala sang Covid-19 pandemic.