Clearing operation ipatuman sang Bacolod Traffic Authority Office sa Aguinaldo kag Gatuslao Streets karon nga sirado na ang portion sang dalan Lacson.
May mga salakyan, stockpile kag iban nga illegal structures nga nagapabilin sa Gatuslao kag Aguinaldo Streets nga amo ang kakason sang katapo sang BTAO antes mag-Biyernes.
Ang Gatuslao kag Aguinaldo Streets ang himuon nga one-way sumugod Biyernes karon nga ginpasirad-an na ang portion sang Lacson Street halin sa intersection sang BS Aquino Drive asta sa South Capitol Road.
Ginsiling ni BTAO Deputy Jose Antonio Robello nga sandig sa na aprobahan nga request sang Bacolod Yuhum Foundation, kinahanglan nga mapatuman ang road closure para hilway nga masuguran ang pag-install sang dalagko nga mga stage kag kiosko nga gamiton para sa Food and Music Festival sa Oktubre 25 asta 27.
Ang Aguinaldo Street ang mangin rota sang mga northbound vehicles kag ang Gatuslao naman para sa mga pakadto southbound nga salakyan ilabi na mga depasahero jeep.