Clearing operation ipatuman batuk sa 151 ka mga vendors sa Burgos Market nga wala nakabayad utang sa renta sa merkado. Bulan pa sang Marso ang ulihi nga deadline nga ginhatag sang Bacolod LGU para sa masobra 200 ka vendors nga wala nagabayad sang utang sa tinuig nga pag renta sang stall sa Burgos Public Market.
Pero asta karon nag gwa nga may 151 gihapon sa mga vendors ang wala gid nakabayad bisan nagsugot na ang siudad nga magbaton sang partial payment.
Gani ginsiling ni City Legal Officer Atty. Romeo Carlos Ting, Jr. antes matapos ang bulan sang Abril suguran sang City Legal Office Enforcement Team ang clearing operation agud mapahalin ang mga manugbaligya nga wala na sang plano magbayad.
May 53 ka mga stalls sa fish section kag 98 naman sa vegetable section ang posible nga mabakante kag luyag sang siudad nga ini ang itugyan gilayon sa iban nga vendors nga interesado.
Nagligad pa nga tuig 2022 sang gin issuehan sang siudad sang notice to pay ang linibo ka mga vendors nga may delinquent accounts. Nalakip diri ang mga nagabaligya sa Burgos, Libertad kag Central Market.