Ginpatigayon sang lokal nga panguluhan sang Bacolod ang clearing operation sa area nga nasunugan sa Barangay 27 agud mahimos kag mapreparar ang lugar para sa masunod nga mga plano sang siudad.
Suno kay Bacolod City Administrator Atty. Mark Mayo, ang clearing ginhimo bilang sabat sa pangabay sang mga pamilya nga biktima sang sunog nga makabalik sa area, bangud wala na sila sang ma istaran kun magbiya na sila sa evacuation center.
Ang operasyon ginapaabot magalawig sang duha ka adlaw.
Dugang pa niya, ginpasalig sang lokal nga panguluhan nga magapadayon ang ila koordinasyon sa national government agencies para sa ginaplano nga relocation survey kag posible nga paghatag sang mas disente nga puluy-ay para sa mga naapektuhan.
Butangan sang entry point ang area para may agyan ang mga salakyan.
Lain man ini sa dalan nga gina plano. Luyag sang siudad nga siguraduhon nga safe ang mga pamilya sa ila liwat nga pagbalik sa ila lugar.
15 ka adlaw lang sila maka tenir sa Apolinario Mabini Elementary School kay mabalik na ang in-person classes sang mga estudyante.
Antes magbalik sa ila lugar ang mga residente, i clear anay ang area sang siudad.
Yara sa masobra sa 250 ka pamilya ang nahalitan sang sunog ukon malapit sa 1,000 ka indibidwal.