Agaw atensyon ang ini nga mga sinako nga basura nga gin bilin sa higad sang dalan sa Purok Paho, Barangay Taculing sa Bacolod City.
Istorya sang mga residente sa lugar, kahapon wala pa sang may naga tumpok nga basura dira sang aga na lang nagtuhaw. Posible ginbilin lang sa lugar sang indi man taga ila. Kay man kun mag abot na ang basurero, amo man ang pag pagwa nila sang ila basura.
Miyerkules kuno kag sabado ang hakutay sang basura sa ila nga lugar kag masami wala man sang problema kun basurero ang paga hambalan. Pagkahibalo nila nga ginlunsar ang Citizen Basura Watch, nalipay sila. Kay luyag nila nga madakpan kun sino man ang naga wigit sang basura sa ila nga lugar.
Sa may Circumferential Road naman, parte na sang Barangay Montevista, layo pa makita na ang ini nga tumpok sang mga basura.
Istorya sang residente sang Purok Riverside sa Montevista nga si Florentino Bacaro Jr. Adlaw adlaw nga may naga hakot sang basura sa higad sang taytay.
Isa lang ka adlaw nga indi makuha, naga tinumpok na dason ang basura kag kun may maka labay nga iban, diri man gina upod ang ila basura. Duha ka adlaw na ini kuno nga wala mahakot.
Pero para sa iya, indi na kinahanglan pa nga ipadangat pa sa mayor ang ini nga problema, dapat kuno sa level pa lang sang purok ukon sang barangay, may gina himo na nga aksyon.
Gina abe abi niya man ang tikang nga ginhimo sang alkalde.
Kaina ginlunsar ang Citizen Basura Watch kun sa diin pwede irekta sang mga pumuluyo sang Bacolod ang problema sa basura pinaagi sa pag click sang link ukon sa QR code.
Pangabay pa gid sang mga pumuluyo nga kun tani mabalik ang music nga gina play sa mga dump truck para mabatian na layo pa kag ma preparar na nga daan sang mga residente ang ila nga mga basura.
[sibwp_form id=1]